молитвы

All posts in the молитвы category

молитвы

Published Февраль 1, 2012 by zoloto7

Молитвы

Тропарь преподобного Евфимия Великого
глас 4
Веселися, пустыня нераждающая,/ благодушствуй, неболящая,/ яко умножи тебе чада муж желаний духовных,/ благочестием насадив,/ воздержанием воспитав добродетелей в совершенство./ Того молитвами, Христе Боже,// умири живот наш.
Кондак преподобного Евфимия Великого
глас 8
В честнем рождестве твоем радость тварь обрете/ и в Божественней памяти твоей, преподобне,/ благодушие прият многих твоих чудес,/ от нихже подаждь богатно в души наша и очисти грехов скверны,// яко да поем: аллилуия.

молитвы

Published Январь 25, 2012 by zoloto7
Тропарь преподобного Иринарха, затворника Ростовского
глас 4
Яко мученика добропроизвольна / и преподобных удобрение, / звезду Ростовскую, / в затворе, узах и веригах Господеви благоугодившаго / и чудес благодать от Него приемшаго, / Иринарха предивнаго песньми хвалебными почтим / и, к нему припадающе, умильно глаголем: / отче преподобне, моли Христа Бога / спастися душам нашим.
Кондак преподобного Иринарха, затворника Ростовского
глас 2
Волнений множество жестоким житием преходя,/ изгнание, затвор и узы железный претерпел еси мужески, Иринарше терпеливодушне,/ нам оставль образ злострадания и терпения твоего,/ озаряя чудес блистаньми с верою приходящих к честному гробу твоему,/ у негоже, яко почесть победную, вериги твоя тяжкия видим,/ от нихже подаеши исцеления недужным./ Сего ради зовем ти:/ радуйся, Иринарше, отче предивный.
Молитва преподобному Иринарху
О великий угодниче Божий и преславный чудотворце, преподобне отче наш Иринарше! Призри на ны, грешныя, в скорбех и обстояниих наших усердно к тебе вопиющия и на тя по Бозе все упование наше возлагающий. Просим тя со умилением многим: твоим предстательством ко Господу Богу испроси нам мир, долгоденствие, братолюбие, земли плодоносие, воздуха благорастворения, дожди благовременны и свыше благословение на вся начинания наша благая. Избави же всех нас святыми твоими молитвами от всяких бед: глада, града, потопа, огня, меча, вредоноснаго червия, тлетворных ветров, смертоносныя язвы и напрасный * смерти, и во всяких скорбех наших буди нам утешитель и помощник, сохраняя ны от падений греховных и сподобляя наследники быти Царствия Небеснаго, да прославляем вкупе с тобою всех благих Подателя, Триедйнаго Бога Отца, и Сына, и Святаго Духа во веки веков. Аминь.
Молитва преподобному Иринарху
О преподобне отче Иринарше! Тебе предстояще, молим тя усердно ходатаем нашим присно быти и заступником. Испроси убо нам от Христа Бога мир, тишину, благоденствие, здравие, и спасение, и от всех врагов видимых и невидимых ограждение, покрый же нас ходатайством твоим от нахождения всяких бед и скорбей, паче же от искушений врага темнаго, да вси мы с тобою прославляем Всесвятое Имя Отца, и Сына, и Святаго Духа, ныне, и присно, и во веки веков. Аминь.

молитвы

Published Январь 23, 2012 by zoloto7
Тропарь преподобного Феодосия
глас 8
Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней, сияя чудесы, Феодосие отче наш,// моли Христа Бога спастися душам нашим.
Кондак преподобного Феодосия
глас 8
Насажден во дворех Господа твоего,/ преподобными твоими добродетельми красно процвел еси/ и умножил еси чада твоя в пустыни,/ слез твоих тучами напаяемая,/ стадоначальниче Божий Божественных дворов.// Темже зовем: радуйся, отче Феодосие.

молитвы

Published Январь 22, 2012 by zoloto7
Тропарь святителя Феофана
глас 8
Православия наставниче,/ благочестия учителю и чистоты,/ Вышинский подвижниче, святителю Феофане богомудре,/ писаньми твоими Слово Божие изъяснил еси/ и всем верным путь ко спасению указал еси,// моли Христа Бога спастися душам нашим.
Кондак святителя Феофана
глас 4

Богоявлению тезоименитый,/ святителю Феофане,/ ученьми Твоими многи люди просветил еси,/ со Ангелы ныне предстоя Престолу Святыя Троицы,// моли непрестанно о всех нас.

молитвы

Published Январь 21, 2012 by zoloto7
Тропарь святителя Филиппа
глас 8
Первопрестольников преемниче,/ столпе Православия, истины поборниче,/ новый исповедниче, святителю Филиппе,/ положивый душу за паству твою,/ темже, яко имея дерзновение ко Христу,/ моли за град же и люди,// чтущия достойно святую память твою.
Кондак святителя Филиппа
глас 3

Православия наставника и истины провозвестника,/ Златоустаго ревнителя,/ Российскаго светильника, Филиппа премудраго восхвалим,/ пищею словес своих разумно чада своя питающа,/ той бо языком хваление пояше,/ устнама же пение вещаше,// яко таинник Божия благодати.

молитвы

Published Январь 20, 2012 by zoloto7
Тропарь священномученика Исидора пресвитера и с ним 72-х в Юрьеве Лифляндском пострадавших
глас 2
Страстотерпцы Господни блаженнии, православную веру Христову со дерзновением проповедасте, и на судищи учения врагов неправая обличисте: того ради и ввержени бысте, святии, во глубину речную, души же ваши вселишася в Небесныя кровы, идеже со святыми предстояще Престолу Царя всех Бога, молитеся Ему за благовернаго императора нашего и за вся православныя люди, подвиги ваша честно почитающия.
Кондак священномученика Исидора пресвитера и с ним 72-х в Юрьеве Лифляндском пострадавших
глас 4
Мученик Христовых лик песньми почтим, пострадавших крепко Христовы ради веры истинныя и вражию гордыню до конца низложивших: озарившеся бо благодатию несозданныя Троицы, славнии, со священномучеником Исидором пострадавшии, яко звезды сияете во всем мире, и ныне молитеся Христу непрестанно, и нас защищаете от враждебных язык нашествия, неусыпнии молитвенницы о душах наших.

Крещенский сочельник (Навечерие Богоявления)

Published Январь 18, 2012 by zoloto7
глас 4
Возвращашеся иногда Иордан река милотию Елиссеевою,/ вознесшуся Илии,/ и разделяхуся воды сюду и сюду/ и бысть ему сух путь, иже мокрый,/ во образ воистинну Крещения,/ имже мы текущее жития преходим шествие:// Христос явися во Иордане освятити воды.
Кондак
глас 2
Всех, Христе, Благоутробне, отъемляй прегрешений множество/ милости ради безмерныя,/ Иорданскими водами креститися грядеши, яко Человек,/ одеждею мя одевая,// славы древния обнаженна люте.